Ўқитувчилар Мактабгача ва мактаб таълими вазирлигини судга берди

 

Мактабгача ва мактаб таълими вазирлиги томонидан ўтказилган аттестация тест синовларининг натижаларидан норози бўлган бир гуруҳ ўқитувчилар судга мурожаат қилди. Бу ҳақда “Халқ таълими инфо” нашри хабар берди.

 

Даъвогарлар томонидан тақдим этилган аризада аттестация имтиҳонларини қайта ўтказиш мажбуриятини юклаш, етказилган маънавий зарар ва вакил харажатларини ундириш талаби илгари сурилган.

 

Маълумот ўрнида, 2025 йил 15 апрелдан 14 майга қадар Ўзбекистон бўйлаб умумий ўрта таълим муассасалари педагоглари учун малака тест синовлари ўтказилган эди. Унга 190 мингга яқин ўқитувчи онлайн тарзда ариза топширган бўлиб, улардан 177 640 нафари (95 фоиз) тестларда иштирок этган.

 

Аттестация натижаларига кўра, 10 504 нафар ўқитувчи олий, 23 200 нафари биринчи ва 27 805 нафари иккинчи малака тоифасига эга бўлди. Шунингдек, 6 603 нафар педагог “мутахассис” лавозимини сақлаб қолди. Умумий ҳисобда 73 мингдан зиёд ўқитувчи ижобий натижа қайд этган. Шу билан бирга, 104 мингга яқин педагог (58,9 фоиз) аттестациядан ўтолмаган.

 

Тест синовлари давомида айрим фан ўқитувчилари ижтимоий тармоқларда тест саволларининг сифати, мазмуни ва спецификацияга мослиги борасида норозилик билдирган.

 

Мактабгача ва мактаб таълими вазирининг ўринбосари Сардор Ражабов ушбу ҳолатларга муносабат билдирар экан, тест саволларига ёки натижаларга эътирози бўлган педагоглар белгиланган тартибда апелляция бериш ҳуқуқига эга эканини эслатиб ўтган эди. Бироқ апелляция комиссияси томонидан юборилган жавобларнинг деярли бир хил ва умумий мазмунга эга бўлгани ўқитувчилар орасида турли эътирозларга сабаб бўлмоқда.