Путин ва Трамп телефон орқали суҳбатлашди

Кремль маълумотига кўра, Россия президенти Владимир Путин ва АҚШ президенти Доналд Трамп ўртасидаги телефон орқали мулоқот деярли бир соат давом этган. Россия президенти ёрдамчиси Юрий Ушаковнинг сўзларига кўра, суҳбат очиқ ва самарали тарзда ўтган. Суҳбат якунида матбуот учун махсус брифинг ўтказилиши режалаштирилмоқда.

 

Музокараларда асосий эътибор Украинадаги вазиятга қаратилган. Трамп ҳарбий ҳаракатларни иложи борича тезроқ тўхтатиш масаласини кўтарган, Путин эса Россия можарони сиёсий музокаралар йўли билан ҳал қилиш имкониятларини излаётганини таъкидлаган. Шу билан бирга, у Россия белгиланган мақсадлардан воз кечмаслигини билдирган.

 

Суҳбат давомида президентлар Эрондаги ва бутун Яқин Шарқдаги умумий вазиятни, Суриядаги ҳолатни, шунингдек, энергетика ва коинотни ўрганиш соҳаларидаги истиқболли қўшма лойиҳаларни ҳам муҳокама қилишган. Ушаковга кўра, икки етакчи ўзаро мулоқотни давом эттиришга келишиб олган.

 

Қизиқарли жиҳати шундаки, Путин Трампни АҚШнинг Мустақиллик куни билан олдиндан табриклаган ва Россиянинг АҚШ давлатчилиги шаклланишида тутган ролини эслатган. Шунингдек, улар анъанавий қадриятларни акс эттирувчи фильмлар алмашинуви ғоясини ҳам муҳокама қилишган — бу таклиф Трампга маъқул бўлган.