Андижонда аёлини ўлдириб қочган эркак ушланди
Гумонланувчи Олтинкўл тумани, Кўмакай маҳалласида қўлга олинган.
4 июль куни соат 09:30 лар атрофида Андижон шаҳрида яшовчи 1977 йилда туғилган D.A. турмуш ўртоғи M.D. билан жанжаллашиб, уни хўжалик пичоғи билан бўйин қисмига уриб ўлдирган.
Воқеа Андижон шаҳрининг Ўрикзор маҳалласида содир бўлиб, аёл оғир тан жароҳати оқибатида воқеа жойида вафот этган. Жиноят содир этган шахс ҳодиса жойидан яширинган.
Ҳолат юзасидан Андижон шаҳар прокуратураси томонидан Ўзбекистон Республикаси Жиноят кодексининг 97-моддаси 1-қисми билан жиноят иши қўзғатилган. Қотилни қўлга олиш учун тезкор-қидирув ишлари бошланган.
Натижада, D.A. Андижон вилояти Олтиариқ туманидаги Кўмакай маҳалласида тунги навбатчиликда бўлган ходимлар томонидан қўлга олинди. Ҳозирда у қамоққа олинган ва тергов ишлари давом этмоқда.
