Самарқанд қоғози географик кўрсаткич сифатида рўйхатдан ўтказилди
Самарқандлик усталар асрлар давомида сақлаб келаётган қоғоз тайёрлаш санъати расмий мақом олди.
“Самарқанд қоғози” Адлия вазирлиги томонидан географик кўрсаткич сифатида давлат рўйхатига олинди. Бу ҳуқуқий мақомга эришишда Самарқанд вилояти адлия бошқармаси ҳамда “Интеллектуал мулк маркази” давлат муассасаси муҳим роль ўйнади.
Бугун Самарқанд вилояти адлия бошқармаси бошлиғи ўринбосари Шуҳрат Абдуҳалимов “Конигил-Мерос” ҳунармандчилик маркази раҳбари Зариф Муҳторовга тегишли ҳужжатни тантанали равишда топширди.
Минг йиллик тарихга эга бўлган Самарқанд қоғози ноёб анъанавий технология асосида тайёрланади. Жараён балхтут новдаларини сувда ивитишдан бошланиб, уларни тозалаш, қайнатиш ва ёғоч устки асбобларда майин толаларга айлантириш билан давом этади. Сўнг бу толалар Сиёб сувида аралаштирилиб, махсус сузгичлар орқали қоғоз шаклига келтирилади.
Ҳар бир қоғоз 8–10 соат тахтакачга бостирилиб, кейин силлиқ юзага ёпиштирилади ва якунда мармар тош устида чиганоқ ёки ақиқ тоши билан жилоланади. Натижада ўзига хос тузилмага эга, мустаҳкам ва чиройли Самарқанд қоғози тайёр бўлади.
Бу қоғоздан нафақат маҳаллий рассом ва хаттотлар, балки Япониядаги қадимий қўлёзмаларни реставрация қилувчи мутахассислар ҳам кенг фойдаланади.
