Кейинги уруш Туркия ва Исроил ўртасида бўлиши мумкин

Яқин Шарқда Туркия ва Исроил ўртасида янги зиддият юзага келиши эҳтимоли ормоқда. Бу ҳақда Financial Times газетаси ўзининг таҳлилий мақоласида таъкидлаган. Нашрга кўра, минтақадаги кучлар мувозанати тобора беқарор бўлиб, икки мамлакат ўртасидаги таранглик очиқ қарама-қаршиликка айланиши мумкин.

 

Туркия Ташқи ишлар вазири Хақон Фидан ИҲТ йиғилишида кескин баёнот берди. “Фаластин, Ливан, Эрон ёки Яман муаммоси йўқ, лекин Исроил муаммоси бор”, — деган Фидан. Президент Эрдўғоннинг яқинлари эса Исроил Туркияни “стратегик жиҳатдан ўраб олганини” даъво қилмоқда. Исроилда эса Туркия таъсири ҳатто Эронникидан ҳам хавфлироқ деб баҳоланмоқда.

 

Сурия ҳозирда асосий тўқнашув майдонига айланган. Туркия Суриянинг шимолини назорат қилаётган бўлса, Исроил жанубдаги буфер зонасини эгаллаб, курдлар ва друз гуруҳларини қўллаб-қувватламоқда. Апрель ойида икки томон ўртасида деярли тўғридан-тўғри ҳарбий тўқнашув юз бергани ҳам қайд этилган.

 

АҚШ минтақадаги кескинликни юмшатишга уринмоқда, аммо бу осон бўлмайди. Вашингтон иттифоқчилари бўлган икки давлат ўртасидаги зиддиятни назорат остида ушлаб туришга ҳаракат қилмоқда. Бироқ мутахассислар назарида, мавжуд геосиёсий муҳитда бу дипломатик мувозанат ҳар қандай вақтда издан чиқиши мумкин.