Ўзбекистонни босиб олишни таклиф қилган сиёсатчи Зеленскийни суиқасд уюштиришда айблади
Ўзбекистон Ташқи ишлар вазирлиги сиёсатчининг баёноти юзасидан расмий норозилик билдирган.
Россиялик сиёсатчи ва ёзувчи Захар Прилепин 2023 йилда ўзига нисбатан уюштирилган суиқасдни Украина Президенти Владимир Зеленский топшириғи билан амалга оширилганини таъкидлади. Бу ҳақда у 50 йиллиги муносабати билан тайёрланган ҳужжатли фильмда сўз юритган. Бу ҳақда ТАСС нашри хабар берган.
Прилепин ўша йили май ойида Нижний Новгород вилоятида автомобили портлатилиши оқибатида яраланган, яқин дўсти Александр Шубин эса ҳалок бўлган. У бу ҳужум ортида Зеленский туришини айтиб, “У менинг ўлимимни шахсан қонунийлаштирган”, дея баёнот берган.
Аввалроқ Прилепин собиқ СССР таркибидаги мамлакатлар, жумладан Ўзбекистонни Россия федерациясига қўшиш таклифини илгари сурган эди. Бу баёнот Ўзбекистонда жиддий эътироз ва кенг муҳокамаларга сабаб бўлди. Депутатлар ва жамоатчилик вакиллари бу фикрни қоралаб чиқишди.
Шундан сўнг, Россиянинг Тошкентдаги элчиси Ўзбекистон Ташқи ишлар вазирлигига чақиртирилди ва Прилепиннинг баёноти юзасидан расмий норозилик билдирилди. Россия ТИВ вакили Мария Захарова эса бу Прилепинга тегишли шахсий фикр бўлиб, Москванинг расмий позициясини акс эттирмаслигини маълум қилди.
