Россияда уч ўзбекистонлик қўлга олинди
Қўлга олинганлар жаримага тортилди ва уларга Россиядан чиқариб юбориш жазоси тайинланди.
Россиянинг Мордовия Республикасидаги Ковилкино шаҳрида ички ишлар ходимлари томонидан қурилиш объектида ҳужжатларсиз ишлаётган уч нафар Ўзбекистон фуқароси қўлга олинди.
Мазкур шахслар меҳнат фаолиятини белгиланган тартибда рухсатномасиз амалга оширганликлари сабабли ҳар бири 9 000 рубль (тахминан 1 миллион 433 минг 595 сўм) миқдорида жаримага тортилди.
Қўлга олинганлар хорижий фуқароларни вақтинча сақлаш марказига жойлаштирилиб, уларга нисбатан Россиядан маъмурий чиқариб юбориш жазоси тайинланди.
Расмийларга кўра, бундай қонунбузарликлар Россияда муҳожирлар билан боғлиқ меҳнат тартибини қатъий назорат қилиш зарурлигини яна бир бор кўрсатмоқда. Маҳаллий ҳукумат органлари ҳужжатсиз ишлаётган хорижликлар бўйича рейдларни кучайтиришни режалаштирмоқда. Шу боис, Ўзбекистон фуқароларига хорижда ишлашдан олдин барча ҳуқуқий талабларни тўлиқ бажарган ҳолда йўлга чиқиш тавсия этилмоқда.
