Туркияда официант бўлиб ишловчи ўзбек аёл отиб ўлдирилди
35 ёшли марҳуманинг жасади Ўзбекистонга юборилади.
2025 йил 5 июль куни Туркиянинг Айдын вилоятида жойлашган овқатланиш муассасаларидан бирида официант сифатида ишлаган 35 ёшли Ўзбекистон фуқароси аёл шахсий зиддиятлар ортидан юзага келган отишма оқибатида бош қисмида оғир жароҳат олиб, воқеа жойида вафот этди.
Ҳодиса юзасидан ҳуқуқни муҳофаза қилувчи органлар томонидан тергов ишлари олиб борилмоқда. Жиноятни содир этганликда гумон қилинаётган 5 нафар шахс қўлга олинган.
Вафот этган ватандошимизнинг жасадини Ўзбекистонга юбориш, шунингдек, унинг яқинларига зарур консуллик ва моддий ёрдам кўрсатиш бўйича Ўзбекистоннинг Истанбулдаги Бош консулхонаси ва Вазирлар Маҳкамаси ҳузуридаги Ташқи меҳнат миграцияси агентлигининг Туркиядаги вакиллиги томонидан тегишли чора-тадбирлар кўрилмоқда.
Ўзбекистон Ташқи ишлар вазирлиги мазкур ҳолатни алоҳида назоратга олган.
