Хитой Тайванга ҳужум қилса, Россия НАТОга қарши ҳаракат қилиши мумкин

 

НАТО бош котиби Марк Руттенинг таъкидлашича, агар Пекин Тайванга ҳарбий куч ишлатишга қарор қилса, бу ҳолат Россиянинг НАТОга қарши ҳаракатларини қўзғатиши мумкин. Бу ҳақда www.dw.com хабар берди.

 

The New York Times’га берган интервьюсида Рутте Хитой раҳбари Си Тсзинпин, агар Тайванга қарши операция бошланса, Россия президентидан Европа эътиборини чалғитиш мақсадида НАТО ҳудудларига ҳужум қилишни сўраши мумкинлигини истисно этмади.

 

“Бундай сценарий тобора реал тус олмоқда”, — деди Рутте.

 

НАТО раҳбари бу хавфга қарши икки асосий чорани таклиф қилди:

 

1. Ғарбий ҳарбий иттифоқларнинг кучайтирилган ҳамкорлиги — “руслар ҳеч қачон ҳужум қилмаслиги учун”.

 

2. Ҳинд-Тинч океани минтақаси билан мудофаа саноати ва инновация йўналишида мустаҳкам алоқаларни йўлга қўйиш.

 

Рутте, шунингдек, Россиянинг ҳарбий салоҳияти тез суръатда ортиб бораётганини таъкидлади: “Улар ҳозирда НАТОга аъзо барча давлатларга қараганда уч баравар кўп ўқ-дори ишлаб чиқармоқда”.

 

Хитой Тайванни ўзининг ажралиб чиққан ҳудуди деб ҳисоблайди ва зарурат туғилса, уни қайта бўйсундириш учун куч ишлатишга тайёр эканини билдирган. АҚШ қонунчилигига кўра, Тайванга нисбатан ҳар қандай тажовуз “ўта жиддий” муаммо сифатида баҳоланади ва ҳарбий жавоб чоралари кўрилиши эҳтимолдан ҳоли эмас.

 

Гарчи Пекин Украина бўйича бетарафликни эълон қилган бўлсада, Хитой ва Россия ўртасидаги стратегик алоқалар давом этмоқда. 2022 йил февраль ойида, Россиянинг кенг кўламли ҳарбий ҳаракатларидан бироз аввал, икки давлат чекловларсиз стратегик шериклик тўғрисида битим имзолаган эди. Бугунги кунда Хитой Россиянинг энг йирик савдо ҳамкори бўлиб, санкциялар таъсирини юмшатишда муҳим роль ўйнамоқда.