Нетаньяху Трампни Нобел мукофотига номзод қилиб кўрсатди
Исроил бош вазири бу ҳақда Трамп билан кечки овқат чоғида айтиб ўтган.
Исроил бош вазири Биньямин Нетаньяху АҚШ президенти Дональд Трампни Тинчлик бўйича Нобел мукофотига номзод қилиб кўрсатганини маълум қилди. Бу ҳақда у Трамп билан кечки овқат чоғида бўлиб ўтган учрашувда айтиб ўтди.
"Мен сизга Нобел қўмитасига юборган мактубимни топширмоқчиман. Унда сизни Тинчлик мукофотига номзод сифатида кўрсатганман. Сиз бу мукофотга муносибсиз ва уни олишингиз керак", — деди Нетаньяху.
Дональд Трамп эса бунга ҳайрат билан ва миннатдорчилик билдирар экан, шундай жавоб қайтарди: "Катта раҳмат! Мен бундан бехабар эдим. Буни айнан сиздан эшитиш мен учун алоҳида қадрлидир. Жуда миннатдорман! Бу мен учун катта шараф".
Трамп президентликка келганидан бери Исроил ва бир нечта араб давлатлари ўртасида муносабатлар тикланишига эришилган эди. Айни шу сабабдан у аввал ҳам Нобел мукофотига номзод сифатида кўрилган.
