ОТМларнинг магистратура босқичига қабул бошланди
Танловларда белгиланган талаб даражасидаги миллий ёки халқаро сертификатга эга шахслар иштирок этиши мумкин.
Ўзбекистон Республикаси давлат олий таълим муассасаларининг 2025/26-ўқув йили учун магистратура мутахассисликларига ҳужжат топшириш жараёни бошланди. Бу ҳақда Олий таълим, фан ва инновациялар вазирлиги расмий баёнот берди.
Номзодлар my.edu.uz платформаси орқали онлайн рўйхатдан ўтишлари мумкин бўлиб, қабул 30 июль (шу куни ҳам) якунланади. Магистратурага ҳужжат топшириш учун абитуриентлардан миллий ёки халқаро даражадаги тил ва касбий билим сертификати талаб этилади.
Магистратурага кириш танловида фақат белгиланган талаб даражасидаги сертификатга эга бўлганлар иштирок этиши мумкин. Талабгорларга қулайлик яратиш мақсадида жараён тўлиқ онлайн тарзда ташкил этилган.
Аввалроқ, 2025/26-ўқув йили учун давлат ОТМларининг бакалавриат босқичига онлайн рўйхатга олиш якунлангани маълум қилинганди. Унда 732 411 нафар абитуриент иштирок этган бўлиб, бу сўнгги 7 йилдаги энг паст кўрсаткич сифатида қайд этилди.
