Пойтахтда 26 та кўча туну-кун ишлайдиган бўлади

10 июль куни Президент Шавкат Мирзиёев Тошкент шаҳридаги қурилиш ишлари, аҳолининг турмуш шароити ва саноат корхоналари фаолияти билан танишди. Ташриф давомида у Шайхонтоҳур ва Чилонзор туманларини қамраб олган йўналишда бўлди. Ушбу туманларни боғлаб турувчи Бунёдкор кўчасининг 1,5 км қисми эндиликда хизмат кўрсатиш ва гастротуризм кўчасига айлантирилди.

 

Кўчада санъат ва маданият масканлари, турли идоралар, савдо нуқталари ва ресторанлар фаолият олиб бормоқда. Президент 90 та тадбиркорлик субъектининг фаолияти билан танишди — уларнинг ярми янги ташкил этилган. Ҳозирда бу ҳудудда 500 нафар фуқаро иш билан таъминланган бўлиб, йилига 255 минг меҳмон ташриф буюрмоқда. Яқин йилларда бу рақам 1 миллионга етказилиши режалаштирилмоқда.

 

Давлат раҳбари туризм соҳасида сўнгги йилларда 2 мингдан ортиқ янги тадбиркор иш бошлаганини қайд этди. 2024 йилда Ўзбекистонга келган хорижий сайёҳлар сони илк бор 10 миллиондан ошган. Шу боис Тошкентда “гавжум кўчалар” концепцияси ривожлантирилмоқда.

 

Мирзо Улуғбек, Олмазор, Чилонзор, Яккасарой, Янги Ҳаёт туманларида шундай масканлар ташкил этилган бўлиб, Бунёдкор кўчаси бу тизимнинг муҳим ҳалқасига айланиши кутилмоқда.

 

Умуман, Тошкент шаҳрида 26 та кўчани туну-кун фаолият юритадиган масканга айлантириш, 24 соат ишлайдиган савдо нуқталарини мингтага кўпайтириш режалаштирилган.

 

Ташриф давомида замонавий автобус бекатлари ва автотураргоҳлар лойиҳаси ҳам тақдим этилди. Президент бу борадаги ташаббусларни қўллаб-қувватлаб, хизмат кўрсатиш сифати ва қулайликларга эътибор қаратиш зарурлигини таъкидлади.