Ўзбеклар ҳалок бўлган Олмаотадаги ҳостел ёнғини бўйича суд ҳукми эълон қилинди
Ҳостелда 72 нафар одам бўлган, улардан 13 нафари ҳалок бўлган.
Олмаота шаҳридаги суд 2023 йил ноябрь ойида юз берган ва 13 кишининг ҳаётига зомин бўлган ҳостел ёнғини бўйича суд ишини якунлади. Суд ҳостел директори Адилбек Муҳамедияров ва ёнғин сигнализациясини ўрнатган компания раҳбари Александр Пекелникни айбдор деб топди.
Тергов маълумотларига кўра, Муҳамедияров бино ҳужжатлари фақат дўкон учун мўлжалланган бўлишига қарамай, унинг биринчи қавати ва ертўласини ноқонуний равишда меҳмонхонага айлантирган. Вентиляция тизими мавжуд эмаслиги, тор йўлакларга тўшаклар жойлаштирилгани ёнғин вақтида эвакуацияни қийинлаштирган. Ёнғин айнан шу жойда бошланиб, катта фожиа келтириб чиқарган.
Суд қарорига кўра, Муҳамедияров ёнғин хавфсизлиги қоидаларини бузганлик ва эҳтиётсизлик оқибатида икки ва ундан ортиқ одамнинг ўлимига сабабчи бўлганликда айбдор деб топилиб, 5 йил муддатга озодликдан маҳрум этилди.
Сигнализация тизимини ўрнатган Александр Пекелник эса сифатсиз жиҳозлардан фойдалангани ва ишларни назоратсиз қолдиргани учун 4 йилга озодликдан маҳрум қилинди. Судда у бу ишларнинг ҳостел учун эмас, бошқа мақсадларда бажарилганини таъкидлади.
Ёнғин содир бўлган вақтда ҳостел ичида 72 киши бўлган. Фожиа оқибатида 13 киши — 9 қозоғистонлик, 2 россиялик ва 2 ўзбекистонлик фуқаро ҳалок бўлди. Барчаси ис газидан заҳарланган.
Суд ҳукмига кўра, айбдорлар ҳалок бўлганларнинг оила аъзоларига маънавий зарар учун ҳар бирига 7 миллион тенге миқдорида товон пули тўлаши лозим.
Бу иш сўнгги йиллардаги энг кўп муҳокама қилинган ва мураккаб суд жараёнларидан бири сифатида эсда қолди.
