Хоразмда ота алимент ўрнига фарзандларига 4 хонали квартира берди
Мажбурий ижро бюроси иши доирасида томонлар ўзаро келишувга эришди.
Хоразм вилоятининг Гурлан туманида яшовчи фуқаро вояга етмаган икки нафар фарзанди учун алимент пулларини олдиндан тўлаш ўрнига, ўзига тегишли кўп қаватли уйда жойлашган квартирани болаларига ҳадя қилди.
Мажбурий ижро бюросининг Гурлан туман бўлими ахборотига кўра, мазкур ҳаракат фуқаролик ишлари бўйича Шовот туманлараро судининг буйруғи асосида олиб борилган ижро иши доирасида амалга оширилган.
Суд қарорiga асосан, фуқаролар Ҳ. Юлдашевдан Н. Тўраева фойдасига, уларнинг вояга етмаган икки нафар фарзандининг моддий таъминоти учун алимент ундириш белгиланган.
Мажбурий ижро бюроси томонидан олиб борилган тушунтириш ишлари натижасида, ота алиментни пул кўринишида эмас, балки мулк орқали олдиндан тўлаш имкониятидан фойдаланди.
Унинг ташаббуси билан Урганч шаҳрида жойлашган, умумий майдони 73,3 квадрат метр бўлган тўрт хонали квартира фарзандларидан бири номига расмий нотариал тартибда ҳужжатлаштирилди.
Бу ҳолат ота ва онанинг ўзаро розилиги асосида амалга оширилди ва қонунчиликка мувофиқ тарзда расмийлаштирилди.
