“Тақтақорача” довонида 7 км узунликда пулли туннел қурилади
Ҳозирда лойиҳага 3 та компания даъвогарлик қилмоқда.
Ўзбекистон Республикаси транспорт вазири Илҳом Маҳкамовнинг маълум қилишича, 2025 йилда Самарқанд вилоятидаги Тақтақорача довонида 7 километр узунликдаги тўловли туннел қурилиши бўйича лойиҳа ҳужжатлари тўлиқ ишлаб чиқилади ва лойиҳа давлат-хусусий шериклик асосида амалга оширилади.
Айни пайтда ушбу туннел лойиҳасини амалга ошириш истагини билдирган 3 та йирик компания танлов асосида кўриб чиқилмоқда. Лойиҳа бўйича геодезия ва геология ишлари якунланган, техник-иқтисодий асос тайёрланмоқда.
Режага кўра, 2026 йил охирига қадар хусусий шерик танлаб олиниб, шартнома имзоланади ва қурилиш ишлари бошланиши кутилмоқда.
Мазкур лойиҳа Тақтақорача довонидан ўтувчи ҳозирги автомобиль йўлида транспорт оқимини камайтириш, ҳаракат хавфсизлигини ошириш ҳамда саёҳат вақтини қисқартиришга хизмат қилади. Туннел тўловли бўлиши режалаштирилган бўлиб, бу лойиҳа харажатларини қоплаш ва унинг самарадорлигини таъминлаш учун муҳим ҳисобланади.
