АҚШ Украинага Патриот ракеталарини етказиб беради

АҚШ президенти Доналд Трамп Украинага Патриот ҳаво мудофааси тизимлари етказиб берилишини маълум қилди. Бу қарор Россиянинг урушни тўхтатиш бўйича музокаралардан бош тортиши ортидан қабул қилинди. Трампнинг айтишича, “Путин кундузлари яхши гапиради, лекин кечаси бомбалашни давом эттиради”.

 

Трамп Патриот ракеталарининг аниқ миқдорини очиқламади, бироқ Украинага замонавий ҳарбий техника юборилишини тасдиқлади. Шунингдек, у бу қуроллар учун тўловни Европа Иттифоқи амалга оширишини билдирди. “Улар тўлиқ тўлашади, биз айнан шуни хоҳлаймиз”, деди Трамп.

 

Бу баёнот Трампнинг Украина бўйича сиёсатида бурилиш ясади. Президент илгари Киевга янги қурол етказиб беришдан бош тортиб келаётганди, бироқ Россия билан тинчлик музокаралари самарасиз якунлангач, позициясини ўзгартирди. Трамп яқинда “мудофаа қуроллари” юборишни бошлашини эълон қилганди.

 

Трамп шу ҳафта НАТО бош котиби Марк Рутте билан учрашади. Учрашувда Киевга қурол етказиб бериш масаласи муҳокама қилиниши кутилмоқда. Шу билан бирга, Конгрессда ҳам Россияга қарши янги санкциялар ва бож ставкаларини жорий этиш бўйича қонун лойиҳаси ишлаб чиқилмоқда.