Шерзод Асадов коммуникациялар бўйича янги лавозимга тайинланди
Ўзбекистон Республикаси Президентининг тегишли фармони билан Президент Администрациясида бир қатор тайинловлар амалга оширилди.
Бугун, 14 июль куни Ўзбекистон Президенти Администрациясида бир қатор лавозим ўзгаришлари амалга оширилди. Давлат раҳбарининг тегишли фармонига мувофиқ, бир нечта янги департаментларга раҳбарлар тайинланди, айрим раҳбарлар эса бошқа лавозимларга ўтказилди ёки озод этилди.
Шерзод Асадов янги ташкил этилган Коммуникациялар департаменти раҳбари — Ўзбекистон Президентининг матбуот котиби лавозимига тайинланди. Шу муносабат билан у аввалги матбуот котиби лавозимидан озод этилди.
Яна бир қанча муҳим тайинловлар:
Алишер Самадов — Президент Администрациясининг Ҳуқуқий экспертиза ва комплекс таҳлил қилиш департаменти раҳбари бўлди. У президент маслаҳатчиси ўринбосари лавозимидан озод этилди.
Дониёр Қодиров — Жамоат хавфсизлиги ва қонун устуворлиги бўйича департаментга раҳбар этиб тайинланди.
Гаяне Умерова — Креатив иқтисодиёт ва туризм йўналиши бўйича янги департамент раҳбари бўлди.
Нодиржон Абдураҳимов — Йиғилиш ва ҳудудларга ташрифлар учун таҳлилий контент тайёрлаш департаментига раҳбарлик қилади.
Бобур Хўжаев — Молиявий технологиялар, рақамлаштириш ва сунъий интеллект бўйича департамент бошлиғи этиб тайинланди.
Элла Жаҳонгирова — Тадбирларни ташкиллаштириш департаменти раҳбарлигига тайинланди.
Зилемхан Ҳайдаров — Администрация Ишлар бошқармаси янги раҳбари бўлди.
Бу ўзгаришлар Президент Администрациясининг ички тузилмасини янгилаш ва самарадорлигини оширишга қаратилган.
