Солиққа оид низоларни судгача ҳал қилиш учун махсус эксперт кенгаши тузилади
Янги тартиб тадбиркорларнинг вақт ва харажатларини тежашга хизмат қилиши кутилмоқда.
Ўзбекистонда тадбиркорлар ва солиқ органлари ўртасидаги низоларни судгача ҳал қилиш учун янги механизм жорий этилмоқда. Президентнинг 2025 йил 11 июлдаги қарорига кўра, Савдо-саноат палатаси ҳузурида Солиққа оид низолар бўйича эксперт кенгаши ташкил этилади.
Мазкур кенгаш солиқ, иқтисодиёт, молия ва ҳуқуқ соҳаларидаги малакали мутахассислардан иборат бўлади. Кенгаш ҳар ойда камида икки марта йиғилиш ўтказиб, тадбиркорларнинг солиқ органлари қарорларидан норози бўлиб қилган мурожаатларини кўриб чиқади. Бироқ бу тартиб жиноят иши доирасида ёки судда кўриб чиқилаётган низоларга тааллуқли эмас.
Эксперт кенгаши мурожаатлар бўйича хулоса чиқаради ва уни мажбурий тартибда солиқ, божхона ҳамда бошқа тегишли давлат органларига юборади. Бу ҳақда тадбиркорга ҳам маълумот берилади. Янги тизим солиққа оид низоларни тез ва шаффоф ҳал этишга хизмат қилиши кутилмоқда.
