Тошкентда фуқаро машина капотини аквариумга айлантирди
Ҳозирда унга нисбатан маъмурий жазо тайинланган.
Ижтимоий тармоқларда Тошкентда бир ҳайдовчи ўз автомобилининг капот қисмига махсус ҳимоя плёнкаси ўрнатиб, ичини сув билан тўлдиргани ва унга тирик балиқлар солганлиги акс этган видео тарқалмоқда. Ушбу ноёб «аквариум» видеоси кўплаб одамларнинг эътиборини тортди, бироқ бу амалиёт экологик жиҳатдан тўғри эмаслиги сабабли қораланди.
Мазкур ҳолат бўйича Тошкент шаҳрининг Экология ва Ички ишлар вазирликлари томонидан тезкор текширув ўтказилган. Текширув натижасида автомобиль капотидаги сув тирик балиқлар учун экологик хавф туғдириши мумкинлиги аниқланган ҳамда бундай ҳаракатлар жамоат тартибини бузиш ва атроф-муҳитга зарар етказиш деб баҳоланган.
Ҳозирда мазкур ҳаракатларни амалга оширган фуқаро маъмурий жавобгарликка тортилиб, унга нисбатан 1 миллион 125 минг сўм жарима белгиланган.
“Мутасаддилар бундай ноодатий ва хавфли тажрибалардан тийилишни ҳамда табиий ресурсларга зарар етказмасликни тавсия қилмоқда”, дейилади хабарда.
