Wizz Air Ўзбекистондан Абу-Дабига рейсларни тўхтатади
Тошкент ва Самарқанд йўналишидаги рейслар ҳам банд қилиш тизимидан олиб ташланди.
Wizz Air лоукостер авиакомпанияси 2025 йил 1 сентябрдан бошлаб Абу-Даби шаҳридан амалга ошираётган барча рейсларни бекор қилишини эълон қилди. Бу қарор операцион қийинчиликлар ва геосиёсий ўзгаришлар сабабли қабул қилинган.
Reuters ахборот агентлиги хабарига кўра, парвозларнинг тўхтатилишига иссиқ иқлим шароитида Pratt & Whitney GTF двигателлари билан боғлиқ узлуксиз муаммолар, ҳаво маконининг ёпилиши ва иқтисодий самарасизлик сабаб бўлмоқда.
Ушбу қарор Ўзбекистон бозорига ҳам таъсир қилади — компания чипталарни банд қилиш тизимидан 1 сентябрдан бошлаб Тошкент–Абу-Даби ва Самарқанд–Абу-Даби рейсларини олиб ташлади.
Wizz Air келгуси фаолиятини асосан Марказий ва Шарқий Европа, шунингдек, Австрия, Италия ва Буюк Британиядаги асосий бозорларига қаратишини маълум қилди.
Эслатиб ўтамиз, Wizz Air 2022 йил декабридан Самарқанд, 2023 йил январидан эса Тошкент орқали Абу-Дабига мунтазам парвозларни амалга ошира бошлаган эди.
