Йоахим Лёв Ўзбекистон терма жамоасига мураббий бўлиши мумкин
Лёв Германия билан 2014 йилги ЖЧ ва 2017 йилги Конфедерациялар кубогида ғолиб чиққан.
Германия терма жамоасининг собиқ бош мураббийи Йоахим Лёв Ўзбекистон миллий жамоасини бошқариши мумкин. Бу ҳақда “Championat.Asia” нашри хабар берди.
Манбаларга кўра, Ўзбекистон футбол ассоциацияси германиялик таниқли мутахассис билан музокараларни бошлаган. Агар Лёв бу таклифни қабул қилса, жорий бош мураббий Тимур Кападзе унинг мураббийлар штабига қўшилиши мумкин.
Маълумот учун, Ўзбекистон миллий терма жамоаси илк бор жаҳон чемпионати финал босқичига йўл олган. Терма жамоа 2026 йилги ЖЧ йўлланмасини қўлга киритган.
Йоахим Лёв 2006–2021 йилларда Германия терма жамоасини бошқарган. Унинг қўл остида Германия 2014 йилги Бразилиядаги Жаҳон чемпионати ҳамда 2017 йил Россиядаги Конфедерациялар кубогида ғалаба қозонган. 2021 йилдан буён у ҳеч бир жамоада фаолият юритмаган.
