Ўртоқлик учрашуви: Ўзбекистон Россияга имкониятни бой берди
Мезбонлар икки тўп фарқи билан олдинда бораётганига қарамай, устунликни сақлаб қола олмади.
Ўзбекистон миллий терма жамоаси Тошкентда Россияга қарши ўтказилган ўртоқлик учрашувида 2:3 ҳисобида мағлуб бўлди.
12 ноябрь куни «Пахтакор» стадионида ўтказилган баҳснинг 4-дақиқасида Виктор Мелёхин тўпни ўз дарвозасига киритиб қўйди. Натижада Ўзбекистон терма жамоаси ҳисобда устунликка эга бўлди.
Иккинчи бўлим бошланиши билан, 46-дақиқада Беҳруз Каримов ўз ҳисобига гол ёздириб қўйди. Унга Достoнбек Ҳамдамов ассистентлик қилди. Шу тариқа Ўзбекистон 2:0 ҳисобида олдинга чиқиб олди.
Бироқ Россия терма жамоаси ўйин якунига яқин ҳисобни ўзгартиришга муваффақ бўлди. 70-дақиқада Николай Комличенко Кирилл Даниловнинг узатмасидан кейин ҳисобдаги фарқни қисқартирди. Орадан беш дақиқа ўтиб, Комличенко яна бир бор дарвозани ишғол этиб, ҳисобни тенглаштирди.
79-дақиқада эса Алексей Миранчук Данил Круговойнинг узатмасидан кейин гол урди ва Россия терма жамоасига ғалаба келтирди.
