“Ташаббусли бюджет”нинг 2-мавсуми бошланди
Ғолиб бўлган 823 та маҳалла бу мавсум ва келгуси мавсумда қатнашмайди.
15 июлдан Ўзбекистон бўйлаб “Ташаббусли бюджет”нинг 2025 йилги иккинчи мавсуми бошланди. Фуқаролар 3 августгача openbudget.uz портали орқали ўз лойиҳаларини таклиф қилиши мумкин. Танлов босқичлари кетма-кет амалга оширилади: лойиҳа қабул қилишдан сўнг саралаш (4–18 август), тарғибот (19–21 август) ва овоз бериш (22–31 август). Ғолиблар 1 сентябрь — Мустақиллик байрами куни эълон қилинади.
Бу мавсумда 823 та маҳаллага танаффус берилди. Сабаби, ушбу маҳаллалар 2024 йилги 2-мавсум ва 2025 йилги 1-мавсумда кетма-кет ғолиб бўлган. Энди улар жорий мавсум ва 2026 йилнинг биринчи мавсумида “Ташаббусли бюджет”да иштирок этмайди. Тўлиқ рўйхат openbudget.uz порталида эълон қилинган.
Шу билан бирга, Наманган шаҳри "Даштбоғ", Когон шаҳри "Нурафшон" ва Шуманай тумани "Бегжап" маҳаллаларининг лойиҳалари 2025 йил 1-мавсумда рад этилгани сабабли, улар танаффусдан чиқарилиб, бу мавсумда қатнашиши мумкин. Бу ҳақда Иқтисодиёт ва молия вазирлиги маълум қилди.
Эслатиб ўтамиз, 2025 йилнинг биринчи мавсумида умумий қиймати 3,2 триллион сўмлик 2 369 та лойиҳа ғолиб бўлганди. Энг кўп овоз олган ташаббуслар ички йўлларни таъмирлаш билан боғлиқ бўлиб, жами 964 та лойиҳа айнан шу йўналишга тўғри келган.
