“Раҳмат, АҚШ!”: Зеленский Украинага ёрдам бергани учун Трампга раҳмат айтди
Украина ва АҚШ президентлари ўртасидаги суҳбат самимий руҳда ўтди.
Украина президенти Владимир Зеленский АҚШ президенти Доналд Трамп билан телефон орқали мулоқот қилгани ҳақида ижтимоий тармоқларда маълум қилди. Зеленский суҳбат ижобий руҳда ўтганини айтиб, Қўшма Штатларга ва Трампга Украинани қўллаб-қувватлаётгани ҳамда адолатли тинчликка эришиш йўлида ҳамкорликка тайёр бўлаётгани учун миннатдорлик билдирди.
Учрашув давомида Трамп НАТО бош котиби Марк Рутте билан бўлиб ўтган суҳбатини ҳам тилга олди. Зеленскийнинг сўзларига кўра, НАТО давлатлари мудофаа харажатларини оширишга ҳаракат қилмоқда ва бу Украина учун муҳим аҳамиятга эга.
Украина раҳбари, шунингдек, Россиянинг ҳужумларига қарши ҳимояни кучайтириш ва позицияларни мустаҳкамлаш бўйича Трамп билан муҳокама олиб борилганини қайд этди. Тинчликка эришиш учун имкон қадар фаол ишлашга тайёрлигини таъкидлади.
Зеленский Трамп билан тез-тез боғланиб, ҳаракатларни мувофиқлаштириб боришга келишиб олинганини айтди ва яна бир бор АҚШга миннатдорчилик билдирди.
