Ўзбекистонда бепул илк ривожланиш марказлари ташкил этилади
Бу марказлар бепул бўлиб, 3–6 ёшли болалар учун қисқа муддатли таълим хизматлари кўрсатади.
2025 йил 14 июль куни Ҳукуматнинг 439-сон қарори билан “Илк ривожланиш марказлари тўғрисида”ги низом тасдиқланди.
Мазкур марказлар мактабгача таълим билан қамраб олинмаган, шунингдек, алоҳида таълим эҳтиёжларига эга бўлган болаларга таълим-тарбия хизматлари кўрсатиш учун ташкил этилади.
Марказлар, асосан, 3–6 ёшдаги болалар, хусусан кам таъминланган ва имконияти чекланган оила фарзандларини қамраб олади.
Илк ривожланиш марказлари қуйидаги икки модель асосида фаолият юритади:
Махсус мактабгача таълим модели – педагоглар 2–7 ёшли болалар яшаш хонадонларига бориб, у ерда таълим-тарбия жараёнини ташкил этади.
Ўйин гуруҳи модели – 3–6 ёшли болалар учун марказларда 3,5–4 соатлик қисқа муддатли машғулотлар ўтказилади.
Марказлар туман (шаҳар) мактабгача ва мактаб таълими бўлимлари ҳузурида очилади.
Илк ривожланиш марказларида таълим оладиган болалардан ота-она тўлови олинмайди.
