Сурхондарёлик 85 ёшли онахон 27 йил аввал хизмат вақтида вафот этган ўғлининг хотира монументини кўргани Тошкентга келди

Пойтахтдаги “Ғалаба” боғида ташкил этилган “Миллат фидойилари” хиёбонида мустақиллик йилларида мамлакат ҳимояси йўлида ҳалок бўлган 196 нафар ҳарбий хизматчилар ва ҳуқуқ-тартибот идоралари ходимлари, жумладан илк бор божхона ходимлари хотирасига ёдгорлик ўрнатилди. Куни кеча ушбу мажмуага хизмат вазифаси чоғида ҳалок бўлган ўғлининг хотирасига ўрнатилган монумент кўриш учун сурхондарёлик онахон ташриф буюрди. 

 

 

Сурхондарёлик Ҳайитой момонинг фарзанди – божхона ходими Ботир Давлатов бундан 27 йил муқаддам – 1998 йилнинг феврал ойида чегара божхона постида хизмат олиб бораётган вақтида халок бўлган эди. “Миллат фидойилари” мажмуасига Ботир Давлатовнинг номи ҳам зарҳал ҳарфлар билан биттилганини эшитиб Сурхондарёнинг Шеробод туманидан пойтахтга ошиқди.

 

Дастлаб Божхона қўмитасига ташриф буюрган Ҳайитой момо Қурбоновани Раис ўринбосари О.Чориев қарши олган.

 

 

Онахон қўмита ҳовлисида қаҳрамон божхоначилар шарафига ўрнатилган мўъжаз монумент қошида ўтганлар хотирасига ҳурмат бажо келтирди, “Божхона тарихи” музейида бўлиб, фарзанди билан боғлиқ экспонатларни кўздан кечирди.

 

Сўнгра меҳмонлар “Ғалаба” боғидаги “Миллат фидойилари” хиёбонида бўлишди. Ҳайитой момо фарзандлари ва неваралари қуршовида Ботир Давлатовни - таҳликали вазиятда ўзини ўйламай, бурчига содиқ қолиб, халқи учун жонини фидо қилган божхона ходимини ёдга олишди.

 

 

 

“Мажмуанинг Божхона қўмитаси бағишланган қисмида божхона фаолиятининг умумий манзараси туялар карвони, турли транспорт воситаларида ташиладиган ташқи савдо юклари фонидаги 4 нафар божхона ходими тимсолида акс этади.

 

Ходимларнинг юз кўринишлари реал ҳаётдаги прототипларга эга. Масалан, мажмуадаги кинолог божхона ходимининг юз тузилиши Божхона қўмитаси Миллий кинология маркази Хизмат итлари билан машқ ўтказиш бўлимининг марҳум ходими Акмал Ўринбоев қиёфасидан олинган.

 

 

 

Касаллиги боис ҳаётдан эрта кетган пскентлик Акмал Ўринбоев ўзининг 10 йиллик фаолияти давомида кинологларни тайёрлаш ва хизмат итларини ўргатишда алоҳида жонбозлик кўрсатди.

 

Унинг ота-онаси Абдували ота ва Шоҳидахон ая “Миллат фидойилари” хиёбонига келиб таскин топишади, хаёлан фарзанди билан суҳбатлашишади”, - дейди қўмита матбуот котиби.