IMEI кодларини рўйхатдан ўтказиш нархи ошгани рад этилди
Божхона қўмитаси ижтимоий тармоқларда IMEI учун тўлов қимматлашгани ҳақида тарқалган хабарларга ойдинлик киритди.
Сўнгги кунларда ижтимоий тармоқларда мобил қурилмаларнинг IMEI-кодларини рўйхатдан ўтказиш нархлари ошиб кетгани ҳақида хабарлар тарқалди. Аслида эса, бу тўлов ўзгармаган ва базавий ҳисоблаш миқдорининг 20 фоизини ташкил қилади – яъни ҳозирда 75 минг сўм. Бу ҳақда Божхона қўмитаси Раисининг матбуот котиби хабар берган.
Шунда “илгари 30-40 доллар эди, энди 100-400 долларга чиқиб кетди” деган гаплар қаердан чиқмоқда?
Бу, асосан, ноқонуний йўллар билан олиб кирилган телефонларни сотаётган шахсларнинг ўзини оқлаш ҳаракатидир. Расмий йўл билан импорт қилинган телефонларда IMEI рақами аллақачон рўйхатдан ўтказилган бўлади.
Масалан, 2024 йилда Ўзбекистонга 1,8 миллион дона, қиймати 188 млн долларлик телефон расмий олиб кирилган. Аммо, ноқонуний киримлар ҳам бор – божхона органлари шу йилнинг ўзида 44 мингдан ортиқ ноқонуний телефонни тўхтатган.
Агар телефон ноқонуний олиб кирилган бўлса, уни рўйхатдан ўтказиш учун қурилманинг божхона қийматидан 30 фоиз миқдорида ягона бож тўлови ундирилади. Шу боис айримлар бу тўловни "IMEI учун нарх ошиб кетди" деб кўрсатмоқда.
Ноқонуний йўллар билан олиб кирилган қурилмалардан эҳтиёт бўлинг, чунки улар нафақат IMEI муаммосини туғдиради, балки сервис хизматларидан ҳам маҳрум қилади.
