Олмалиқда боғча тарбиячиси 2 ёшли болани калтаклади
Вояга етмаган болага етказилган жароҳат юзасидан суриштирув бошланди.
Ижтимоий тармоқларда тарқалган видеоларда кичик ёшдаги болага нисбатан зўравонлик содир этилгани ҳақидаги хабарлар ортидан Болалар омбудсмани ушбу ҳолат юзасидан суриштирув бошланганини маълум қилди.
Расмий маълумотларга кўра, 2025 йил 16 июль куни Тошкент вилоятининг Олмалиқ шаҳрида жойлашган оилавий нодавлат мактабгача таълим муассасасида 2 ёшли қизалоқ – О.М. (2023 йилда туғилган) тарбиячи Қ.Г. томонидан урилган. Натижада боланинг чап ёноқ қисмига тан жароҳати етказилган.
Ҳолат бўйича ҳозирда Олмалиқ шаҳар ИИБ томонидан терговга қадар текширув ишлари олиб борилмоқда. Шунингдек, суд-тиббий экспертиза тайинланган.
Болалар омбудсмани мазкур ишни ўз назоратида сақлаб, қонуний чоралар кўрилиши юзасидан якуний маълумотлар тақдим этилишини билдирган.
