Тожикистон ва Ўзбекистон Роғун ГEС электр энергияси бўйича 20 йилга шартнома тузди
Ўзбекистон Роғун ГЭСдан ҳар киловатт-соатини 3,4 сентдан сотиб олади.
Тожикистон ҳукумати Ўзбекистон билан Роғун ГЭС электр энергиясини етказиб бериш бўйича ҳамкорлик битимини имзолашга розилик берди. Битим доирасида дастлабки келишувга кўра, Роғун ГЭСдан Ўзбекистонга ҳар киловатт-соат электр энергияси 3,4 АҚШ сентидан етказиб берилади. Нарх ҳар йили 1 фоизга индексация қилинади. Бу ҳақда Asia plus нашри хабар берган.
Электр энергияси етказиб бериш бўйича якуний шартлар “Роғун ГЭС” ва Ўзбекистоннинг "Узенергосотиш" компаниялари ўртасидаги алоҳида шартномада белгиланади. Бу шартнома 20 йилга мўлжалланган ва ҳар 10 йилда автоматик равишда узайтирилиши мумкин.
Роғун электр энергияси Ўзбекистон энергетика тизимидаги қувват танқислиги юзага келадиган вақтларда, яъни асосан ёзги мавсумда етказиб берилади. Бу етказиб беришлар “Барки Точик” компаниясининг мавжуд экспортлари билан параллель тарзда амалга оширилади.
Ҳозирча Роғун ГЭС тўлиқ қувватда ишламаётган бўлсада, келгусида станция ишга тўлиқ тушгач, электр энергияси йил давомида мунтазам экспорт қилиниши режалаштирилган.
