Тукия ва Эрон Сурия суверенитетини қўллаб-қувватлайди, АҚШ томонларни босиқликка чақирмоқда, БМТ esa...

Сўнгги кунларда Сурия ва Исроил ўртасида кескинлик кучайгани халқаро ҳамжамиятни ташвишга солди. АҚШ президенти Доналд Трамп бу борада ҳар икки томон билан суҳбатлашганини айтиб, вазиятни юмшатишга чақирди. "Биз Сурия ва Исроил ўртасида тушунмовчилик борлигини биламиз. Ҳар икки томон билан гаплашдим, энди эса можаро чуқурлашмаслиги учун ҳаракат қилмоқдамиз", деди Трамп. Бу ҳақда The Washington post хабар қилган.

 

Reuters хабарига кўра, Туркия ташқи ишлар вазири Хоқон Фидан ҳам вазият юзасидан ўз позициясини билдирди. Унинг сўзларига кўра, Анқара Сурия барқарорлигига таҳдид солувчи сиёсатларга тоқат қилмайди. "Биз Сурия халқаро ҳамжамият томонидан тан олиниши учун жиддий ҳаракатлар қилдик. Аммо Исроилнинг Дамашққа уюштираётган ҳужумлари бу жараённи тўхтатиб қўймоқда", деди Фидан.

 

Эрон ташқи ишлар вазири Абас Арокчи ҳам Теҳроннинг Сурия масаласидаги позициясини тасдиқлади. "Эрон ҳар доим Сурия суверенитети ва ҳудудий яхлитлигини қўллаб-қувватлаб келади. Биз Сурия халқининг ёнидамиз ва шундай бўлиб қолади", деди Эрон дипломати.

 

Бирлашган Миллатлар Ташкилоти Бош котиби Антониу Гутерриш Исроилнинг Сурия ҳудудига ҳаво ҳужумларини қоралайди, Араб Республикаси суверенитети ва ҳудудий яхлитлигини бузишни тўхтатишга чақиради. Бу ҳақда жаҳон ташкилоти раҳбарининг расмий вакили Стефан Дюжаррик брифингда маълум қилди.

 

"Бош котиб Исроилнинг Ас-Сувайда ва Сурия пойтахти Дамашққа ҳаво ҳужумлари кучаяётганини, шунингдек, Исроил армияси кучларининг Голан тепаликларида қайта жойлаштирилиши ҳақида хабар берилганини қоралайди. У Сурия суверенитети ва ҳудудий яхлитлигига қарши ҳар қандай қоидабузарликларни зудлик билан тўхтатишга чақиради", - деди БМТ Бош котиби.