Лабубу қўғирчоқлари “иблис тимсоли” сифатида ёқиб юборилмоқда
Ижтимоий тармоқларда Лабубу ва ёвуз руҳ образлари ўртасидаги боғлиқлик ҳақидаги миш-мишлар тарқалди.
Сўнгги кунларда Лабубу номи билан танилган машҳур коллекцион қўғирчоқлар ижтимоий тармоқларда баҳс-мунозарага сабаб бўлмоқда. Миш-мишлар ва назарияларга кўра, ушбу ўйинчоқлар қадимий Месопотамия мифологиясидаги ёвуз руҳ — Пазузу билан боғлиқ бўлиши мумкин. Бу ҳақда Mustshare News нашри хабар берди.
Пазузу — қадимий мифларда жануби-ғарбий шамол ҳукмдори, бахтсизлик ва касаллик олиб келувчи иблис сифатида тасвирланади. Унинг тасвири кўпинча шер юзи, бўртиб чиққан кўзлар, қуш қанотлари ва тирноқлар билан ифода этилган. Айнан Лабубу қўғирчоқларининг ғайриоддий кўриниши — катта кўзлари ва айёр жилмайиши ижтимоий тармоқ фойдаланувчилари орасида хавотир уйғотган.
Ушбу қўрқувлар 1973 йилда суратга олинган “Exorcist” фильмидаги Пазузу образини эслатгани боис янада кучайди. ОАВ хабарларига кўра, баъзи одамлар қўғирчоқларда “иблис энергияси” мавжудлигига ишонгани сабабли уларни ёқиб юборган.
Шунга қарамай, мутахассислар ва аксарият интернет фойдаланувчилари бу алоқанинг ҳеч қандай тарихий ёки визуал асосга эга эмаслигини таъкидламоқда. Уларнинг фикрича, бу оддий тасодиф ва оммавий хаёл маҳсули, холос.
