Тошкентда йўловчилар метронинг иссиқлигидан шикоят қилмоқда
Тармоқда тарқалган видеомурожаатга расмийлар изоҳ берди.
Ижтимоий тармоқларда Тошкентда метрополитен вагонларида ҳавонинг иссиқлиги юзасидан шикоят қилган йўловчининг мурожаати кенг тарқалмоқда. Ҳолат юзасидан “Тошкент метрополитени” ДУК ахборот хизмати расмий муносабат билдирди.
Қайд этилишича, янги турдаги поездлар барча замон талаблари асосида ишлаб чиқарилган бўлиб, ёзнинг жазирамасида махсус совитиш ва совуқ кунларда ўзининг иситиш каби кўплаб қулайликларига эга.
Интернетдаги видеомурожаатда таъкидланган ҳаракат таркиби кўп йиллик фойдаланилаётган эски турдаги ҳаракат таркиби бўлиб, ишлаб чиқарувчи томонидан махсус совитиш тизими мавжуд бўлмаган ҳолда ишланган ва бу турдаги қурилма билан жиҳозлаш имконсиз.
Таъкидланишича, хизмат кўрсатиш сифатини ошириш мақсадида янги ҳаракат таркиблари хариди йўлга қўйилган ва жараён давомий тарзда амалга оширилади. Бунинг натижасида босқичма-босқич равишда метро вагон паркидаги поездлар янгиланиши режаланган.
