Юлдуз Усмонованинг қўшиғини куйлаган хонанда жаримага тортилди
“Ниҳол” мукофоти совриндори муаллифлик ҳуқуқини бузган деб топилган.
Адлия вазирлиги томонидан ўрганилган мурожаат асосида хонанда Гулжахон Холхўжаева муаллифлик ҳуқуқини бузганликда айбдор деб топилди ва жаримага тортилди. Бу ҳақда Муаллифлик ва турдош ҳуқуқларни ҳимоя қилиш жамоат бирлашмаси хабар бермоқда.
Аниқланишича, таниқли шоир Абдусаъид Абдусаломовга тегишли бўлган, “Саломий” тахаллуси билан машҳур бўлган муаллифнинг “Сенмидинг” номли шеъри унинг рухсатисиз ижро этилган. Ушбу шеър Ўзбекистон ва Қорақалпоғистон халқ артисти Юлдуз Усмонова томонидан куйланган қўшиқ матни сифатида оммага танилган.
Текширув натижасига кўра, хонанда Гулжахон Холхўжаева ушбу асарни муаллиф рухсатисиз фойдаланган. Ҳолат юзасидан Маъмурий жавобгарлик тўғрисидаги кодекснинг 177 прим 1-моддасига асосан баённома расмийлаштирилиб, иш судга юборилди.
Жиноят ишлари бўйича Мирзо Улуғбек туман судининг қарорига кўра, Гулжахон Холхўжаевага жарима жазоси тайинланди.
Қонунчиликка кўра, муаллифлар ҳуқуқбузардан зарар ўрнига базавий ҳисоблаш миқдорининг 20 бараваридан 1000 бараваригача товон талаб қилиш ҳуқуқига эга.
