Британия, Германия ва Франция Европада янги мудофаа иттифоқини тузмоқда
Европа давлатлари НАТОдан мустақил равишда янги мудофаа блокини шакллантиришга киришди.
Яқинда Британия, Германия ва Франция ўзаро алоқаларини мустаҳкамлаб, НАТОдан ташқари янги мудофаа ҳамкорлигини йўлга қўймоқда. Defence Express хабарига кўра, ўтган ҳафта Британия бир вақтнинг ўзида Германия ва Франция билан икки муҳим мудофаа шартномасини имзолади.
Британия ва Германия ҳужум содир бўлса, ўзаро ёрдам беришни кафолатлайди. Бу ҳамкорлик НАТОнинг 5-моддаси мавжуд бўлсада, алоҳида ҳимоя механизми сифатида шаклланмоқда.
Бундан ташқари, Британия ва Франция ядровий кучларни мувофиқлаштириш ва узоқ масофали ракеталарни биргаликда ишлаб чиқиш бўйича келишувга эришди. Хусусан, улар мавжуд Storm Shadow ракетасини модернизация қилиб, 2000 км масофагача етадиган янги ракеталар яратишни режалаштирмоқда.
Ушбу янги ҳаракатлар Европада хавфсизлик бўйича “янги Антанта”ни шакллантиришга ўхшайди. Экспертлар буни АҚШнинг ишончлилиги борасидаги шубҳалар ва Россиядан келаётган таҳдидлар кучайгани билан боғламоқда.
