Навоий шаҳрини қоплаган оқ тутун бўйича расмий маълумот: ҳавода зарарли газлар аниқланди
“Навоийазот” атрофида зарарли моддалар нормадан ошди — Экология бошқармаси расмий таҳлил натижаларини эълон қилди.
Куни кеча ижтимоий тармоқларда эрта тонгда Навоий шаҳрини оқ, чангсимон тутун қоплагани ҳақида видеолар ва фотоматериаллар тарқалди. Ҳолат бўйича фуқаролар томонидан “Навоийазот” акциядорлик жамиятининг фаолияти билан боғлиқ тахминлар илгари сурилди.
Мазкур вазиятга аниқлик киритиш мақсадида Экология, атроф-муҳитни муҳофаза қилиш ва иқлим ўзгариши бўйича Навоий вилоят бошқармаси томонидан ҳаво намуналари олинган ва лаборатория таҳлиллари ўтказилган.
Соат 07:00 дан 09:00 гача бўлган оралиқда “Навоийазот” АЖ атрофидан олинган намуналарда қуйидагилар аниқланган:
Аммиак — меъёрдан 1,4 баравар юқори;
Водород сульфиди — 16,8 баравар юқори.
Шунингдек, Зулфияхоним кўчасидаги мониторинг постида олинган натижаларда:
Углерод икки оксиди — 1,04 баравар;
Аммиак — 1,1 баравар меъёрдан юқори бўлгани қайд этилган.
Расмий хабарга кўра, ҳозирда “Навоийазот” АЖ фаолиятидаги техник ва экологик камчиликлар ҳамда эҳтимолий қонунбузарликларни аниқлаш мақсадида махсус текширув тайёрланмоқда. Мазкур жараёнда назорат органлари ва тегишли мутахассислар иштирокида ҳуқуқий чора-тадбирлар белгиланади.
