7 йиллик танаффусдан кейин Самарқанд ва Душанбе ўртасида мунтазам авиақатновлар йўлга қўйилади

Ўзбекистоннинг Сентрум Аир авиакомпанияси Тошкент—Душанбе—Тошкент ҳамда Самарқанд—Душанбе—Самарқанд йўналишларида мунтазам авиақатновларни йўлга қўйди.

 

Тошкент—Душанбе—Тошкент парвози 19 июлдан бошлаб ҳафтасига икки марта — чоршанба ва шанба кунлари амалга оширилади. Чипта нархи 653 минг сўмдан бошланади.

 

Самарқанд—Душанбе—Самарқанд йўналишида эса 20 июлдан бошлаб мунтазам рейслар қайта тикланди. Парвозлар пайшанба ва якшанба кунлари амалга оширилади. Ушбу йўналишдаги чипта нархи 608 минг сўмдан бошланади.

 

Парвозлар Ўзбекистон ва Тожикистон ҳукуматлари ўртасида 2018 йил 9 март куни имзоланган ҳаво қатнови бўйича битим асосида ташкил этилган.

 

Бундан ташқари, ушбу йўналишда Сомон Аир ва Узбекистан Аирвайс авиакомпаниялари ҳам парвозларни амалга оширади.

 

Тожикистон ҳукумати 2025 йил 12 июнь куни “Очиқ осмон” сиёсатини эълон қилган. Бу қарор хорижий ва маҳаллий авиакомпаниялар ўртасидаги парвозлар сонини тенглаштириш бўйича аввалги чекловларни бекор қилади ва рақобатни эркинлаштиради.

 

Эслатиб ўтамиз, Ўзбекистон ва Тожикистон шаҳарлари ўртасидаги авиақатновлар 1992 йилда тўхтатилган ва 2017 йилда қайта тикланган эди. Самарқанд—Душанбе йўналишида сўнгги парвозлар 2018 йилда амалга оширилган бўлсада, кейинчалик тўхтатилган эди. Эндиликда ушбу рейслар ҳам қайта тикланди.