Аббосбек Файзуллаев ҳам “Башакшеҳир” клубига ўтади
Туркия клуби ушбу трансфер учун 7,5 миллион евро тўлашга тайёр.
Ўзбекистон терма жамоаси ва Москванинг "ССКА" клуби футболчиси Аббосбек Файзуллаев Туркиянинг “Башакшеҳир” клуби билан шартнома имзолашга яқин турибди. Манбага кўра, Москванинг "армиячилар"и ва Истанбул клуби футболчи борасида келишувга эришган.
Файзуллаев яқин кунларда Туркияга учиб боради ва тиббий кўрикдан ўтгач, “Башакшеҳир” билан шартнома имзолайди. Туркия клуби ушбу трансфер учун 7,5 миллион евро тўлашга рози бўлган. Аммо футболчининг Истанбул клуби билан неча йиллик битим имзолаши ҳозирча номаълум.
Агар трансфер амалга ошса, Файзуллаев “Башакшеҳир” сафидаги иккинчи ўзбекистонлик футболчига айланади. Аввалроқ ушбу клуб Италиянинг "Рома" жамоасидан Элдор Шомуродовни мавсум охиригача ижарага олган эди.
Маълумот учун, Аббосбек Файзуллаев ўтган мавсум "ССКА" таркибида барча мусобақалар доирасида 39 та учрашувда майдонга тушиб, 3 та гол ва 8 та голли узатмага муаллифлик қилган. Футболчининг "армиячилар" билан амалдаги шартномаси 2026 йил ёзигача мўлжалланган. Трансфермаркт портали унинг трансфер қийматини 8 миллион еврога баҳолаган.
