Ўзбекистонда 97 фоиз аҳоли рақамли кўникмаларни муваффақият калити деб ҳисоблайди
IT форуми доирасида эълон қилинган тадқиқот натижалари рақамли саводхонлик, онлайн хизматлар ва истиқболли IТ касблар борасида муҳим кўрсаткичларни очиқлади.
Ўзбекистонда рақамли саводхонликни ошириш ва IТ соҳасини ривожлантириш бўйича ўтказилган йирик тадқиқот натижалари эълон қилинди. Сўровнома натижаларига кўра, аҳолининг 97 фоизи рақамли кўникмаларни муваффақият калити деб билади.
Тадқиқот 2025 йил март–июнь ойларида бутун мамлакат бўйлаб ўтказилди ва унда 4 мингдан ортиқ фуқаро иштирок этди. Респондентлар орасида эркак ва аёлларнинг улуши деярли тенг бўлиб, 50,7 фоизини аёллар, 49,3 фоизини эркаклар ташкил этди.
Сўровда иштирок этганларнинг 96 фоизи IТ соҳасига қизиқишини билдирган. IТ кўникмалари даражаси бўйича респондентларнинг 17 фоизи ўзини аъло, 44 фоизи яхши, 32 фоизи эса қониқарли даражада деб баҳолади.
Масофавий иш ва ўқиш бўйича ҳам статистик маълумотлар аниқланди. Респондентларнинг 57 фоизи ҳар ҳафта видеоалоқа воситаларидан фойдаланишини билдирди. Шунингдек, 78 фоиз иштирокчи ҳар ой Электрон ҳукумат тизимларидан фойдаланади.
Онлайн харид қилиш бўйича сўров натижаларига кўра, 52,4 фоиз аҳоли ойига 2-3 марта маркетплейс ва ижтимоий тармоқлар орқали харид қилади. 25 фоиз аҳоли йилига 2-3 марта онлайн харид амалга оширади. 22 фоиз респондент эса умуман онлайн харид қилмайди.
Форум давомида “Келажак касблари атласи” тақдим этилди. Бу атласда 45 та истиқболли IТ касби белгиланган бўлиб, у ёшлар, ота-оналар, таълим муассасалари ва иш берувчиларга амалий йўналиш беради.
Тадбирда DigiSurvey.uz онлайн платформаси ҳам ишга туширилди. Бу платформа орқали тадқиқот натижалари марказлаштирилади, бепул IТ таълим ресурслари жойлаштирилади ва касбий йўналтириш имконияти яратилади.
Лойиҳа IТ таълим уюшмаси ва Швейцария тараққиёт ва ҳамкорлик агентлиги (SDC) ҳамкорлигида амалга оширилмоқда. Ишлар 2024 йил сентябрь ойида бошланган бўлиб, биринчи босқичда аҳолининг IТ саводхонлиги ва малакасидаги бўшлиқлар аниқланмоқда. Кейинги босқичларда эса махсус таълим дастурлари, ўқитувчилар малакасини ошириш ва талабалар учун касбий кўмак механизмлари жорий қилинади.
Форумда IТ Парк, Рақамли таълимни ривожлантириш маркази, AlmaU ва бошқа ташкилотлардан мутахассислар иштирок этди. Панель муҳокамалар, стартаплар, инновациялар, нетворкинг ва интерактив сессиялар ўтказилди.
Ташкилотчилар қаторида Ўзбекистон Республикаси Рақамли технологиялар вазирлиги, IТ Парк Ўзбекистон, Рақамли таълимни ривожлантириш маркази, Ўзбекистон ногиронлар ассоциацияси, IТ Ladies ҳамжамияти ва Ёшлар ишлари агентлиги ҳам бор.
