Сентябрдан Аи-80 бензини ишлаб чиқарилиши тўхтатилади — “Ўзбекнефтгаз”
Энди босқичма-босқич юқори октанли бензин ишлаб чиқариш ва сотишга ўтилади
“Ўзбекнефтгаз” 2025 йил сентябрь ойидан бошлаб Аи-80 маркали автобензинни ишлаб чиқаришни тўлиқ тўхтатишни режалаштирган. Компания 2026 йилдан бошлаб фақат юқори октанли Аи-92 ва Аи-95 бензинлари ишлаб чиқаришга ўтишни мақсад қилган.
Бу қарор "Ўзбекистон–2030" стратегиясининг “Атроф-муҳитни асраш ва яшил иқтисодиёт” йили доирасида қабул қилинган Президент фармони асосида амалга оширилмоқда. 2024 йил бошида Энергетика вазирлиги ҳам Аи-80 бензинидан босқичма-босқич воз кечилишини маълум қилганди. Қирғизистон ва Тожикистон каби мамлакатларда бу бензин тури аллақачон тақиқланган.
Бухоро ва Фарғона нефтни қайта ишлаш заводлари орқали Аи-80 бензинининг ўрнини юқори сифатли ёнилғи босиб олади. Бухоро НҚИЗда присадка ёрдамида Аи-92 бензинининг церийали ишлаб чиқарилиши йўлга қўйилади. Шу тариқа, компания ишлаб чиқариш таннархини пасайтириш ҳамда экологик талабларга мос ёнилғи ишлаб чиқаришни мақсад қилган.
2025 йилда жами 1 миллион 30 минг тонна бензин ишлаб чиқарилиши режалаштирилган бўлиб, шундан 487 минг тоннаси Аи-80 ва 543 минг тоннаси Аи-92+ бўлади. Сентябрь ойидан бошлаб эса фақат юқори октанли бензин ишлаб чиқарилади. Шу тариқа, Аи-80 маркали бензин захиралари 2025 йил охиригача тўлиқ тугатилади.
