Бухорода сотилаётган оздирувчи қаҳвалар таркибида кучли таъсир қилувчи моддалар аниқланди

Ғиждувонда ўтказилган тезкор тадбир давомида Давлат хавфсизлик хизмати ва ҳуқуқни муҳофаза қилувчи органлар таркибида кучли таъсир қилувчи модда бўлган оздирувчи кофелар ва дориларнинг ноқонуний савдосига чек қўйди. Бу ҳақда Zamon.uz'га ДХХ хабар қилган.

 

Бухоро вилояти Давлат хавфсизлик хизмати ва Бош прокуратура ҳузуридаги Департамент томонидан ўтказилган рейдда 1985 йилда туғилган, илгари ҳам судланган фуқаронинг уйи кўздан кечирилди. Текширув натижасида божхона расмийлаштирувларидан ўтмаган ва ҳужжатлари бўлмаган чет элда ишлаб чиқарилган турли хил оздирувчи кофелар ва дорилар аниқланди.

 

Жами мусодара қилинган маҳсулотлар сони 100 минг донадан ортиқни ташкил этди. Аниқланган маҳсулотлар орасида қуйидагилар бор: KETO COFFEE MIX SLIM COFFEE, SLT SLIM LUX COFFEE, HOODIA CACTUS SLIMMING COFFEE, SLIM GREEN COFFEE, NATURE COMPLEX LK FAT BURNING, LAO SE LON, FIT90 FAT BURNER, REDUKSIN LIGHT, TSINSISHOU PLUS ва бошқа дори воситалари.

 

“Фармацевтика маҳсулотлари хавфсизлиги маркази” ДМ хулосасига кўра, ушбу маҳсулотлар таркибида сибутрамин моддаси мавжуд. Сибутрамин Ўзбекистон Вазирлар Маҳкамасининг 2019 йилдаги 818-сонли қарорига асосан кучли таъсир қилувчи моддаларга киритилган.

 

Мазкур ҳолат юзасидан фуқаро ҳақида Жиноят кодексининг 251-1 моддаси 5-қисми билан жиноят иши қўзғатилди. Ҳозирда тергов ишлари олиб борилмоқда. Дорилар ва кофелар хориждан қандай олиб кирилгани аниқланмоқда.