Ўзбекистонда портатив лазер қурилмалари учун жавобгарлик жорий этилади
Ушбу турдаги лазер қурилмаларининг ноқонуний муомаласини чекловчи қонун лойиҳаси қабул қилинди.
Қонунчилик палатасида портатив лазер қурилмаларининг ноқонуний муомаласини чекловчи қонун лойиҳаси иккинчи ўқишда қабул қилинди. Лойиҳага кўра, бундай қурилмаларни ноқонуний равишда олиб кириш, сақлаш ёки ишлатиш ҳолатлари учун маъмурий жавобгарлик белгиланиши кўзда тутилмоқда.
Депутатлар лазер нурлари хавфсизлик, айниқса ҳаво транспорти ҳаракати учун жиддий таҳдид туғдиришини таъкидлашмоқда. Хусусан, айрим ҳолатларда лазер нури самолёт учувчилари кўзига тушиб, вақтинчалик кўриш қобилиятининг йўқолишига олиб келган. Бу эса парвоз хавфсизлигига бевосита таҳдид солади.
Қонунчиликдаги бу ўзгаришлар фуқароларнинг ҳаёти ва саломатлигини, жамоат тартибини ҳамда авиация хавфсизлигини таъминлашга хизмат қилади. Шу билан бирга, портатив лазерлардан масъулият билан фойдаланиш маданиятини шакллантиришга ҳам ҳисса қўшади.
