Қозоғистон-Ўзбекистон чегарасида контрабанда туннели аниқланди
Нефт маҳсулотларини ноқонуний олиб ўтишга хизмат қилган ушбу йўл орқали халқаро жиноий гуруҳ икки ой давомида фаолият юритган.
Қозоғистон ва Ўзбекистон чегарасида ёнилғи-мойлаш материалларини ноқонуний олиб ўтиш мақсадида қазилган 450 метр узунликдаги ер ости туннели аниқланди. Бу ҳақда Қозоғистон Молиявий мониторинг агентлиги (AFM) ТАСС ахборот агентлигига таянилиб маълум қилди.
Қайд этилишича, Туркистон вилояти ҳудудида жойлашган туннел орқали икки ой давомида нефт маҳсулотлари контрабандаси амалга оширилган. Прокуратура мувофиқлаштирган ҳолда AFM, Қозоғистон Миллий хавфсизлик қўмитаси ҳамда Ўзбекистон ҳуқуқ-тартибот органларининг қўшма тезкор тадбири натижасида халқаро жиноий гуруҳ фаолиятига чек қўйилди.
Тезкор тадбир давомида контрабанда фаолиятида иштирок этган барча шахслар аниқланган. AFM маълумотларига кўра, ушбу жиноий схемада Ўзбекистон фуқаролари ҳам бўлган, шунингдек, Қозоғистоннинг беш нафар фуқароси гумондор сифатида аниқланган.
Ҳозирда туннел бутунлай бартараф этилган, жиноятчиларига нисбатан қонуний чоралар кўрилмоқда.
