Телефонида тақиқланган каналларга обуна бўлган ўзбекистонликлар Россияга киритилмади

Россия чегара хизмати Ўзбекистон ва Тожикистон фуқароларининг мобил қурилмаларида террористик ва экстремистик ташкилотлар ҳамда радикал каналларга обуна бўлиш ҳолатларини аниқлаган тақдирда, уларнинг мамлакат ҳудудига киришига рухсат бермаяпти. Бу ҳақда ТАСС ахборот агентлиги 20 дан ортиқ суд ҳужжатларига таяниб хабар берди.

 

ТАСС маълумотларига кўра, айрим фуқароларнинг телефонларида терроризм ва экстремизм тарғиботи билан боғлиқ каналларга обуналар аниқланган. Шунингдек, айрим шахслар Украина тарафини қўллаб-қувватловчи каналларга обуна бўлгани ҳамда Россия ҳуқуқ-тартибот органлари хатти-ҳаракатларини танқид қилувчи ёзишмалар сақлаб қўйилгани аниқланган. Баъзи ҳолатларда эса фуқаролар чегарадан ўтишдан олдин мессенжердаги ёзишмаларни ўчириб ташлашга уринган. Россия чегарачилари бу ҳаракатларни хавфсизликка таҳдид деб баҳолаган.

 

Хабарда қайд этилишича, 2024 йил март ойида Москва яқинидаги “Crocus City Hall” концерт залида содир этилган терактдан сўнг Россия чет эл фуқароларини текшириш чораларини кучайтирган. Ушбу ҳодиса бўйича Тожикистон фуқаролари қўлга олингани маълум қилинган.

 

Сўнгги бир ярим йил ичида Тожикистон ва Ўзбекистоннинг 20 дан ортиқ фуқароси Россияга кириш тақиқи устидан судга шикоят қилган, бироқ барча ҳолатларда суд қарори рад этиш тарафида бўлган.