Тошкентдаги тунги клубда мижоз ходимга тан жароҳати етказди
Мижоз пақилдоқ (хлопушка)ни клуб ходимаси юзига қаратa отиши оқибатда аёл кўз ва пешона соҳасида оғир жароҳат олиб, шифохонага ётқизилди.
17-июль куни соат 02:00 атрофида Тошкент шаҳри, Яшнобод туманида жойлашган тунги клублардан бирида хизмат кўрсатаётган аёл оғир тан жароҳати билан шифохонага ётқизилди. Бу ҳақда Тошкент шаҳар Ички ишлар бош бошқармаси расмий маълумот берди.
Дастлабки суриштирувларга кўра, клубга ташриф буюрган 2000 йилда туғилган М.К. исмли фуқаро томонидан қасддан ишлатилган пақилдоқ (хлопушка) клуб менежери — 1980 йилда туғилган А.Р.нинг юз қисмига отилган. Натижада жабрланувчи фуқаронинг кўз олмаси контузияси, юқори қовоқ ва пешона соҳасида юмшоқ тўқималарнинг лат еши, шунингдек, шилган жароҳатлар аниқланган.
Зудлик билан тиббий ёрдам кўрсатилган ходима ҳозирда шифокорлар назоратида. Ҳолат юзасидан Яшнобод тумани Ички ишлар бўлими томонидан терговга қадар текширув ишлари олиб борилмоқда.
