Юнусободда ўзини 9-қаватдан ташлаган 23 ёшли фуқаро тирик қолди
Ҳодиса тафсилотлари маълум қилинди.
Тошкент шаҳрининг Юнусобод туманида 23 ёшли фуқаро 9-қаватдан ўзини ташлаб, тирик қолди. Бу ҳақда пойтахт ИИББ расмий изоҳ берди.
Воқеа 2025 йил 21 июль куни соат тахминан 01:30 да содир бўлган. Юнусобод тумани, 9-мавзеда жойлашган кўп қаватли уйлардан бирида, 2002 йилда туғилган фуқаро Т.Р. ўзининг яшаш хонадонидаги деразадан пастга сакраган.
Фуқаро кириш йўлагининг том қисмига урилиб, ерга тушган. Натижада унга “Бош мия ёпиқ жароҳати, бош мия чайқалиши, чап ўмров суяги ва ўнг кўкрак суяги синиши, биринчи бел умуртқаси компрессион синиши (2-3 даража), травматик шок (2-даража)” ташхиси қўйилган ва шифохонага олиб борилган.
Ҳозирда бемор шифокорлар назоратида.
Ўрганиш жараёнида аниқланишича, фуқаро 2024 йил охиридан бери руҳий ҳолатида ўзгаришлар кузатилган ва психолог-шифокор назоратида бўлган.
Мазкур ҳолат юзасидан Юнусобод тумани ИИО ФМБ томонидан терговга қадар текширув ўтказилмоқда. Текширув якунида қонуний қарор қабул қилиниши таъминланади.
