Андижонда сотувчисини калтаклаган аёлга нисбатан жиноят иши қўзғатилди
Дўкон эгаси бўлган аёл қўл остида ишловчи 20 ёшли қизни қарз масаласи сабаб дўппослаган.
Ижтимоий тармоқларда бир аёлнинг бошқа бир аёлга нисбатан зўравонлик қилган ҳолатини акс эттирган видео кенг тарқалди. Ҳолат юзасидан расмийлар томонидан суриштирув ишлари бошланган.
Маълум бўлишича, воқеа Андижон шаҳрининг "Ҳунарманд" маҳалласида жойлашган кийим дўконида содир бўлган. Дастлабки маълумотларга кўра, 1992 йилда туғилган дўкон эгаси қарз масаласи сабаб қўл остида ишловчи, 2005 йилда туғилган сотувчи қизни дўппослаган.
Ҳозирда аёлга нисбатан Жиноят кодексининг 138-моддаси 2-қисми (зўрлик ишлатиб, ноқонуний равишда озодликдан маҳрум қилиш) бўйича жиноят иши қўзғатилди. У гумонланувчи сифатида ушланган.
Ҳуқуқни муҳофаза қилувчи органлар воқеа юзасидан тергов ҳаракатларини олиб бормоқда.
