Аёл жиноятчиларига енгиллик бериш – жиноятга йўл очишми?

Ўзбекистон Республикаси Олий Мажлиси Қонунчилик палатаси депутати, “Миллий тикланиш” демократик партияси раиси Алишер Қодиров Жиноят кодексида аёллар учун назарда тутилган енгиллаштирувчи нормалар бўйича ҳуқуқий механизмларни қайта кўриб чиқиш зарурлигини билдирди.

 

Депутат бу таклифини яқинда Тошкент шаҳридаги хусусий боғчалардан бирида рўй берган оғир ҳодиса – икки ёшли боланинг вафоти билан боғлиқ суд қароридан кейин илгари сурди. Суд қарорiga кўра, болани зўравонлик билан ўлдиришга сабаб бўлган тарбиячи аёл атиги олти йил муддатга озодликдан маҳрум этилди.

 

Қодиров ушбу жазо чорасини “инсонийлик” ниқоби остидаги адолатсизлик деб атап, аёллар томонидан содир этилаётган оғир жиноятлар сонининг ортиш эҳтимолини эслатиб ўтди. У Жиноят кодексининг 50-моддасида белгиланган, аёллар учун жазони енгиллаштирувчи норма амалда жиноий ҳаракатларга рағбат сифатида хизмат қилиши мумкинлигини таъкидлади.

 

“Қонун жинсга қараб эмас, жиноятнинг оғирлиги ва оқибатларига қараб баҳоланиши керак”, — деди у.

 

Депутат ушбу масалани юридик соҳа мутахассислари билан биргаликда муҳокама қилиб, зарур қонунчилик ўзгартиришларини расман таклиф қилиш ниятида эканини маълум қилди.

 

Бундан ташқари, Қодиров таълим тизимида кадрлар сиёсатини кучайтириш бўйича бир қатор ташаббусларни илгари сурди. У жумладан:

 

– тарбия ва таълим соҳасида ишлаётган ходимлар учун пенсия ёшини 50 га тушириш,

– пенсия ёшидаги шахсларнинг болалар билан тўғридан-тўғри ишлашини чеклаш,

– ёш, малакаги эга мутахассисларни тизимга кенг жалб этиш таклифларини илгари сурди.

 

Қодировнинг бошқа соҳалардаги баёнотлари ҳам жамоатчилик эътиборини тортмоқда. Жумладан, у:

 

– шаҳар атрофидаги магистрал йўлларда тезлик чегарасини 130 км/соатгача ошириш,

– 25–30 йилдан ортиқ хизмат қилган автомобилларни фойдаланишдан чиқариш,

– дарахт кесиш борасида ортиқча эҳтиросларга йўл қўймаслик ва бу борада мувозанатли ёндашувни таклиф қилди.

 

Шунингдек, ички ишлар тизими ислоҳоти юзасидан у малакали, тажрибали кадрлар фаолият юритиши зарурлигини таъкидлаб, коррупция ва таниш-билишчиликдан холи тизим бўлиши кераклигини билдирди.