Ҳиндистон Хитой фуқароларига сайёҳлик визаларини қайта беришни бошлайди

Ҳиндистон жорий йилнинг 24 июль санасидан бошлаб Хитой фуқаролари учун сайёҳлик визаларини қайта беришни бошлайди. Бу ҳақда мамлакатнинг Хитойдаги элчихонаси маълум қилди. Виза бериш амалиёти сўнгги уч йилдан ортиқ вақт мобайнида илк марта тикланмоқда.

 

Ҳиндистон ва Хитой ўртасидаги муносабатлар 2020 йилда Ҳимолай чегарасида юз берган ҳарбий тўқнашувдан сўнг кескинлашган эди. Ҳодиса ортидан Ҳиндистон Хитой сармояларига чекловлар жорий қилди, юзлаб хитойлик иловаларни тақиқлади ҳамда авиақатновларни қисқартирди.

 

Хитой ҳам ўша даврда Ҳиндистон ва бошқа давлатлар фуқароларига виза беришни тўхтатган, бироқ 2022 йилда COVID-19 пандемияси сабаб жорий этилган чекловларни бекор қилиб, талабалар ва бизнес сафарлар учун визаларни қайта тиклаганди. Туристик визалар эса фақат жорий йил март ойида авиақатновлар қайта йўлга қўйилгачгина муҳокамага чиққан.

 

Икки мамлакат ўртасида муносабатлар аста-секин яхшиланмоқда. Ўтган йили Хитой раҳбари Си Сзинпин ва Ҳиндистон бош вазири Нарендро Моди ўртасида Россияда юзма-юз учрашув бўлиб ўтган. Хитой Ташқи ишлар вазирлиги матбуот котиби Гуо Жиакуннинг айтишича, Пекин ушбу ижобий қадамни қайд этган ва икки мамлакат ўртасида шахсий алоқаларни яхшилашга тайёр.

 

Эслатиб ўтамиз, Ҳиндистон ва Хитой ўртасида 3 800 км (2 400 миль) узунликдаги баҳсли чегара мавжуд бўлиб, бу муаммо 1950 йиллардан бери музокаралар марказида қолмоқда. 1962 йилда икки давлат ўртасида қисқа, аммо оғир қуролли уруш ҳам бўлиб ўтган. Июль ойида Ҳиндистон Ташқи ишлар вазири хитойлик ҳамкасбига чегарадаги зиддиятларни бартараф этиш, ҳарбий кучларни олиб чиқиш ҳамда ўзаро савдога тўсқинлик қилувчи чораларни бекор қилиш зарурлигини билдирганди.