Наманганда она ва болани сигир сузиб юборди
Сигир уйи олдида ўйнаб юрган 2 ёшли қизчани сузиб кетган, уни ҳимоя қилмоқчи бўлган онаси ҳам сигирнинг ҳужумига учраган.
Ижтимоий тармоқларда сигир ёш қизчани ва уни ҳимоя қилмоқчи бўлган онасини сузиб, тепиб юборган ҳолат акс этган видео тарқалди. Мазкур воқеа юзасидан Наманган вилояти Ички ишлар бошқармаси Матбуот хизмати расмий маълумот берди.
Қайд этилишича, 2025 йил 16 июль куни соат 19:30 да Наманган вилояти шошилинч тез тиббий ёрдам маркази томонидан соат 18:47 да содир бўлган ҳодиса ҳақида хабар олинган. Унга кўра, Янгиқўрғон тумани «Баркамол» маҳалласида яшовчи, 1968 йилда туғилган фуқаро A.O. ўзига тегишли қорамолларни бошқа ҳудуддаги ер участкасидан яшаш уйига олиб келаётганда, уйи олдида ўйнаб юрган 2023 йилда туғилган R.X. ва уни ҳимоя қилмоқчи бўлган онаси, 1989 йилда туғилган A.D. сигир томонидан сузилиб, тан жароҳати олган.
Янгиқўрғон туманлараро суд-тиббий экспертизасининг хулосасига кўра, фуқаро A.D.ga ўртача оғир, вояга етмаган R.X.ga эса енгил даражадаги тан жароҳати етказилган.
Республика шошилинч тиббий ёрдам илмий марказининг Наманган филиалидан олинган маълумотга кўра, жабрланганларга уй шароитида даволаниш учун рухсат берилган ва ҳозирда улар амбулатор тарзда уйда даволанмоқда.
Ҳозирда ҳолат юзасидан Янгиқўрғон тумани ИИБ томонидан терговга қадар текширув ишлари олиб борилмоқда.
