Сурия Туркиядан ёрдам сўради
Бу ёрдам Суриянинг ҳудудий яхлитлигини сақлаш, сиёсий бирликни қўллаб-қувватлаш ва минтақавий барқарорликни таъминлашга қаратилган.
Туркия Миллий Мудофаа вазирлиги (МСБ) вакили Туғамирал Зеки Актурк 23 июль куни IDEF 2025 халқаро мудофаа саноати кўргазмасида ўтказилган матбуот анжуманида Суриянинг янги ҳукумати томонидан расмий ёрдам сўралганини тасдиқлади. Бу ҳақда Anadolu нашри хабар берган.
"Суриянинг янги ҳукумати томонидан, айниқса DAISh (ISIS) ва бошқа барча террористик гуруҳларга қарши курашда ҳамда мудофаа имкониятларини мустаҳкамлаш мақсадида, Туркиядан расмий ёрдам сўралган. Ушбу сўров доирасида биз ҳарбий тайёргарлик, маслаҳат ва техник ёрдам кўрсатишга тайёрмиз," — деди Актурк.
MSB баёнотига кўра, бу ёрдам Суриянинг ҳудудий яхлитлигини сақлаш, сиёсий бирликни қўллаб-қувватлаш ва минтақавий барқарорликни таъминлашга қаратилган. Шунингдек, Туркия Суриядаги тинчликни мустаҳкамлаш ва террор таҳдидларига қарши стратегик ҳамкорликни давом эттириш тарафдори эканини билдирди.
MSB манбаларига кўра, Туркия ва Сурия ҳукумати ўртасидаги ушбу яқин ҳамкорлик минтақада ижобий геосиёсий ўзгаришларга туртки бўлиши мумкин.
